မဟာဗျူဟာရေးဆွဲခြင်းလုပ်ငန်းစဉ် – ၁
နောက်လှည့်ကြည့်ခြင်း
မဟာဗျူဟာတခုရေးဆွဲရာတွင် အဖွဲ့အစည်းတခုအနေဖြင့် လာခဲ့ရာလမ်းကို ပြန်လည်သုံးသပ်ရန် လိုအပ်သကဲ့သို့ လက်ရှိရောက်နေသည့်အဖွဲ့အစည်း၏အနေအထား၊ လုပ်ငန်းလုပ်ဆောင်ရသည့် အခြေအနေများနှင့် ယင်းအခြေအနေများအားလုံးအပေါ် မူတည်၍ ရှေ့ကြုံတွေ့နိုင်ရသည့်အနာဂတ်ကို မျှော်မှန်းတွက်ချက်ပြီး အဖွဲ့အတွက်အကောင်းဆုံးမဟာဗျူဟာများချမှတ်ကြရသည်။
မဟာဗျူဟာရေးဆွဲရာတွင် အသုံးပြုသည့် စကားလုံးများနှင့် အဓိပ္ပါယ်ဖွင့်ဆိုချက်များ
မျှော်မှန်းအိပ်မက် (Vision) – အဖွဲ့အစည်းတခု၏ အောင်မြင်မှုပုံရိပ်၊ အဖွဲ့အစည်း၏ လုပ်ငန်းများကို မည်သို့ သော အိပ်မက်(များ) အတွက် လုပ်ဆောင်နေသည်ဆိုသည်ကို အဖြေပေးနိုင်သည့် အောင်မြင်မှု လမ်းညွန်ပုံရိပ်
ရပ်တည်(ခံယူ)ချက် (Mission Statement) – အခြားအဖွဲ့အစည်းနှင့် မတူညီကွဲပြားသည့် အဖွဲ့အစည်း ဖြစ်တည်လာမှုအကြောင်း၊လုပ်ဆောင်မည့်လုပ်ငန်းများနှင့် လုပ်ဆောင်မည့်ပုံစံများကိုဖော်ပြချက်
ပန်းတိုင် (Goal) – အဖွဲ့အနေဖြင့် မည်သည့်အရာများကို အောင်မြင်အောင်လုပ်ဆောင်မည်ဆိုသည်ကို ဖော်ပြ ချက် (အချို့အဖွဲ့အစည်းများသည် Vision အစား ပန်းတိုင်ကိုသာချမှတ်လုပ်ဆောင်ကြသည်များလည်း ရှိသည်။)
ရည်မှန်းချက်/ရည်ရွယ်ချက်(Objective) – ပြောင်းလဲမှုများဖြစ်အောင် လုပ်ဆောင်မည့်လုပ်ငန်းများကို ကြိယာများ (verbs)ကို အသုံးပြု၍ ဖော်ပြချက် (ဥပမာ သေချာစေရန်၊ လျော့နည်းစေရန်၊ လျော့ကျရန်၊ တိုးပွားစေရန်၊ တိုးတက်ကောင်းမွန်စေရန်)
မဟာဗျူဟာ (Strategy) – ရည်မှန်းချက်/ရွယ်ချက်များအောင်မြင်ရရှိစေရန်အတွက် မိမိတို့တွင်ရှိသည့် အရင်းအမြစ်များကို အကောင်းဆုံးအသုံးချပြီး၊ အားနည်းချက်များကို ဆန်းစစ်ဖော်ထုတ်၍ အခွင့်အလမ်းများကို အသုံးချကာ စိန်ခေါ်မှု နှင့် ခြိမ်းခြောက်မည့်နည်းလမ်း
လုပ်ငန်းများ (Activities) – မဟာဗျူဟာများကိုအကောင်အထည်ဖော်ရန် လုပ်ဆောင်ချက်များ
မျှော်မှန်းရလဒ် (Expected Result/Outcome) – မျှော်မှန်းထားသည့်ရလဒ် (ချမှတ်ထားသည့် မဟာဗျူဟာ ကို အောင်မြင်အောင်လုပ်ဆောင်နိုင်လျှင် ရရှိမည်ဟုမျှော်မှန်းထားသည် အကျိုးဆက်)
က) အဖွဲ့အစည်း၏ဖြတ်သန်းမှုများကို ပြန်လည်သုံးသပ်ခြင်း
၁။ အဖွဲ့အစည်း၏နောက်ခံသမိုင်း
မဟာဗျူဟာရေးဆွဲသည့်လုပ်ငန်းစဉ်ကို အဖွဲ့အစည်းတခု စတင်ဖွဲ့စည်းတည်ထောင်ခဲ့သည့်သမိုင်း၊ အဖွဲ့ အစည်း၏ ဖြစ်စဉ်သမိုင်း (timeline) ရေးဆွဲခြင်းဖြင့် စတင်လေ့ရှိကြသည်။ အဖွဲ့စတင်တည်ထောင်သည့် သမိုင်းကို ပြန်လည်သုံးသပ်မှတ်တမ်းတင်သည့် လုပ်ငန်းစဉ်သည် အဖွဲ့အစည်းတွင်ပါဝင်ပတ်သက်သူများ အားလုံးအတွက် စိတ်ဝင်စားစရာ၊ဂုဏ်ယူစရာကိစ္စတခုလည်းဖြစ်သကဲ့သို့ အဖွဲ့အစည်း၏လက်ရှိအဖွဲ့ဝင်များ အတွက်လည်း မိမိတို့ပါဝင်ပတ်သက်နေသည့် အဖွဲ့အကြောင်းကို သေချာစွာသိရှိရစေသည်။ ကလေးသူငယ်များ စောင့်ရှောက်ရေးရန်ပုံငွေအဖွဲ့ (Save the Children Fund – SCF) ကို ၁၉၁၉ ခုနှစ်တွင် ပထမကမ္ဘာစစ်အပြီး စစ်ဘေးဒဏ်ကြောင့် ငတ်မွတ်မှုများခံစားခဲ့ရသည့်ကလေးများ အထူးသဖြင့် ဂျာမဏီနှင့် ဩစတြီးယား-ဟန်ဂေရီတို့အတွက် အရေးပေါ်ရန်ပုံငွေများ ပံ့ပိုးရန် ရည်ရွယ်ချက်ဖြင့် အင်္ဂလန်နိုင်ငံ လန်ဒန်မြို့တွင် စတင်ဖွဲ့စည်းခဲ့ကြသည်။ ယင်းအဖွဲ့အတွက် ရန်ပုံငွေရရှိရန် အင်္ဂလန်နိုင်ငံတွင် ပင်စင်စား လူကြီးများက ဘတ်စ်ကားဂိတ်များ တွင် ငွေအလှူခံပုံးလေးများကိုင်၍ အလှူခံစုဆောင်းခဲ့သည်ဟု ယင်းအဖွဲ့တွင် လုပ်ကိုင်ခဲ့စဉ်က မြန်မာနိုင်ငံဆိုင်ရာ ညွှန်ကြားရေးမှူးက ရှင်းပြခဲ့ဖူးသည်။ နိုင်ငံတကာ ကယ်ဆယ်ရေး ကော်မတီ (International Rescue Committee – IRC) ဖြစ်လာသည့် International Relief Association ကိုလည်း အိုင်းစတိုင်းကသူကဲ့သို့ စစ်ဘေးဒုက္ခသည်များကို ကူညီပံ့ပိုးရန် ၁၉၃၃ ခုနှစ်တွင် စတင်ဖွဲ့စည်းခဲ့သည်။ ထို့အတူပင် မြန်မာနိုင်ငံတွင် ပထမဆုံးဖြစ်သည့် မင်းကွန်းလူအိုရုံ(ဘိုးဘွားရိပ်သာ) ကို ဒေါ်ဦးဇွန်းက ရန်ကုန်မြို့ရှိ ကန်တော်လေး ရှိ ခရစ်ယာန်ဘိုးဘွားရိပ်သာကို သွားရောက်ခဲ့ပြီးနောက် ၁၉၁၅ ခုနှစ်တွင် စတင်တည်ထောင်ရန်စိတ်ကူးရခဲ့သည်။ ထို့နောက် သထုံ၊ပေါင်းတည်၊ ရန်ကုန်မြို့ရှိ နှင်းဆီကုန်းဘိုးဘွားရိပ်သာ နှင့် ပခုက္ကူမြို့တွင်လည်း ဆက်လက် တည်ထောင်ခဲ့သည်။
အောက်တွင် နမူနာဆွဲပြထားသည့် Timeline သည် စိတ်ကူးယဉ်ဖွဲ့စည်းထားသည့် Love Our Trees အဖွဲ့ ၏ ထူးခြားဖြစ်စဉ်များကို ရေးဆွဲပြထားခြင်းဖြစ်သည်။
မိမိတို့အဖွဲ့အစည်းစတင်တည်ထောင်ခဲ့သည့်သမိုင်းနှင့် လက်ရှိအခြေအနေအကြား အပြောင်းအလဲများကိုလည်း မှတ်တမ်းတင်ထားရှိခြင်း တနည်းအားဖြင့် timeline ဆွဲထားခြင်းကလည်း အဖွဲ့တွင်နောက်မှပါဝင်လာခဲ့ရသူများ အနေဖြင့် အဖွဲ့၏အပြောင်းအလဲများ လုပ်ဆောင်ကြသည့်ဖြစ်စဉ်ကို သေချာစွာနားလည်သဘောပေါက်စေနိုင် သည်။Save the Children ကို ၁၉၁၉ ခုနှစ် တွင် စတင်ခဲ့ပြီး ကလေးသူငယ်များ ကာကွယ်စောင့်ရှောက်ရေး ကမ္ဘာလုံး ဆိုင်ရာလှုပ်ရှားမှုကို ဦးဆောင် လှုပ်ရှားနိုင်ခဲ့ကြသည်။ စတင်တည်ထောင်ခဲ့သူ Eglantyne Jebb သည် ၁၉၂၃ ခုနှစ်တွင် ကလေးသူငယ် အခွင့် အရေး ကြေညာစာတမ်းကို ပြုစုရေးသားခဲ့သည်။ ၁၉၃၂ ခုနှစ်တွင် အမေရိကန် နိုင်ငံတွင်လည်း Save the Children အဖွဲ့ကို တည်ထောင်ခဲ့ပြီး ၁၉၇၂ ခုနှစ်တွင် နိုင်ငံအလိုက် Save the Children အဖွဲ့များစုစည်း၍ Save the Children Alliance ကိုစတင်ဖွဲ့စည်းခဲ့သည်။ ၁၉၉၇ ခုနှစ်တွင် Save the Children Alliance ကို စနစ်တကျ ပြန်လည်စုစည်း၊ ဖွဲ့စည်းခဲ့ကြသည်။ ၂၀၁၀ ခုနှစ်တွင် Save the Children International ဟုအမည်ပြောင်းလဲ ခေါ်ဆိုပြီး နိုင်ငံအလိုက်အဖွဲ့အားလုံးကို တစုတစည်းတည်းဖွဲ့စည်းခဲ့သည်။ ယင်းသမိုင်းကြောင်းသည် ၁၉၉၉ ခုနှစ် ဝန်းကျင်က SCF – UK အဖြစ်ရှိခဲ့စဉ်တွင် လုပ်ကိုင်ခဲ့ဖူးပြီး မြန်မာနိုင်ငံ တွင် ထိုအချိန်က SCF – US နှင့် SCF – UK တို့ရှိခဲ့သည်ကို သိရှိသူတဦးအတွက် မိမိလုပ်ကိုင်ခဲ့ဖူးသည့် အဖွဲ့ အစည်းတခု၏ အပြောင်းအလဲကို အလွယ်တကူမြင်သာထင်သာဖြစ်စေသကဲ့သို့ ယခုလက်ရှိ Save the Children International တွင်လုပ်ကိုင်နေသူများအတွက်လည်း စိတ်ဝင်စားစရာ အရွေ့များကို သိရှိရစေသည်။ လေ့ကျင့်ခန်းအနေဖြင့် နမူနာဆွဲပြထားသည့် Love Our Trees အဖွဲ့ timeline ကို ကြည့်ပြီး Save the Children ၏ သမိုင်း ကို ဆွဲကြည့်နိုင်ပါသည်။
| အဖွဲ့အစည်း သမိုင်းကြောင်း ၁၉၁၉ ၁၉၂၃ ၁၉၃၂ ၁၉၇၂ ၁၉၉၇ ၂၀၁၀ ၂၀၁၆ ၂၀၂၅ | |
| အဖွဲ့အစည်း၏အဓိကအဖြစ်အပျက်များ၊ အပြောင်းအလဲများကို စာရင်းပြုစုဖော်ပြပါ။ (နှစ်အစဉ်အလိုက် စီစဉ်ဖော်ပြပေးပါ။) | |
| အဖွဲ့အစည်းအား သက်ရောက်မှုရှိစေသည့် ပြင်ပအဖြစ်အပျက်များကို နှစ်အစဉ်လိုက် စာရင်းပြုစု ဖော်ပြ ပေးပါ။ ဥပမာ – ကိုဗစ်ကပ်ရောဂါဖြစ်ပွားခြင်း၊ လုပ်ငန်းလုပ်ဆောင်သည့်ဒေသများတွင် ရေကြီးရေလျှံဖြစ်ပွားခြင်း | |
| ဖြတ်သန်းမှုမှ ရရှိသည့် သင်ခန်းစာများ – တည်ငြိမ်မှုနှင့် အဖွဲ့ဖွံ့ဖြိုးတိုးတက်မှုကို ဖြစ်စေသည့် အခရာကျသည့် အချက်များ | ဖြတ်သန်းမှုမှ ရရှိသည့် သင်ခန်းစာများ – အဖွဲ့ကို မတည်မငြိမ်ဖြစ်စေသည့် ကိစ္စများ |
အဖွဲ့အစည်းဖွံ့ဖြိုးတိုးတက်မှုတွင် ဖြတ်သန်းခဲ့သည့်အတွေ့အကြုံများမှ သင်ခန်းစာယူခြင်းသည် အရေးကြီးသည့် အစိတ်အပိုင်းတခုဖြစ်သည်။ ဖြတ်သန်းခဲ့သည့်သမိုင်းတလျှောက် အဖွဲ့အစည်း၏လုပ်ငန်းများတိုးတက်အောင် မြင်မှု၊ အဖွဲ့အပေါ်အသိအမှတ်ပြုခံရမှု၊ တည်ငြိမ်သည့်အခြေအနေများဖြစ်အောင် ပံ့ပိုးကူညီပေးနိုင်သည့် အချက် များနှင့် ရံဖန်ရံခါတွင် အဖွဲ့အတွင်း အကြောင်းအမျိုးမျိုးကြောင့် ပြဿနာများစွာနှင့် ရင်ဆိုင်ကြုံတွေ့ရသည်များ ကို ပြန်လည်စဉ်းစားသင်ခန်းစာယူနိုင်ပါသည်။ ဥပမာအနေဖြင့် Save the Children ကိုပင်နမူနာပေးရလျှင် စတင် တည်ထောင်ခဲ့သည့် Eglantyne Jebb သည် ပထမကမ္ဘာစစ်အပြီး ငတ်မွတ်ခေါင်းပါးနေသည့် ကလေးငယ်များ၏ ပုံများကို ကြည့်ရှုပြီး ဂရုဏာသက်ခဲ့ရာမှ အရေးပေါ်ငွေကြေးရန်ပုံငွေများရရှိနိုင်စေရန် ကြိုးပမ်းလှုံ့ဆော်ခဲ့သည်။ ထို့အပြင် သူ၏ကလေးများအား ဂရုဏာသက်မှုအခြေအနေ၊ အပြစ်မဲ့ကလေးများ စစ်မက်ဒဏ်ကြောင့် ခံစား ရသည့်အတိဒုက္ခများအား အခြားသူများအားလည်း ကူးစက်စေရန် ကြိုးပမ်းနိုင်မှု မှတဆင့် တကမ္ဘာလုံးဆိုင်ရာ လှုပ်ရှားမှုအထိဖြစ်အောင် လုပ်ဆောင်ပေးနိုင်ခဲ့သည်။ မိမိ၏စိတ်ခံစားချက်၊ သနားဂရုဏာကို ကူးစက်အောင် ပြုလုပ်နိုင်ခြင်းက အဖွဲ့၏လျင်မြန်စွာဖွံ့ဖြိုးတိုးတက်မှုကို ဖြစ်စေခဲ့သည့် အခရာကျသည့်အချက်တချက်ဖြစ်သည်။ ၂၀၂၀ ခုနှစ်တွင် အဖွဲ့အစည်းအတွင်း ဝန်ထမ်းဖွဲ့စည်းပုံနှင့် လစာများ အပြောင်းအလဲပြုလုပ်ခြင်းကြောင့် ခေါင်းဆောင်မှုအပိုင်းအပေါ် ဝန်ထမ်းများစွာမကျေမနပ်ဖြစ်ကြခြင်းကိုမူ အဖွဲ့အစည်းကို မတည်မငြိမ်ဖြစ်စေသည့်အချက်တချက်အနေဖြင့် ထည့်သွင်းစဉ်းစား၍ ရမည်ဖြစ်သည်။
မဟာဗျူဟာရေးဆွဲခြင်းလုပ်ငန်းစဉ်တွင် သမိုင်းကြောင်းများရေးဆွဲခြင်းနှင့်အတူ အောက်ပါမေးခွန်းများကို ဖြေကြား၍ အဖွဲ့အစည်းတွင် ပါဝင်ပတ်သက်သူများ၏ အဖွဲ့အပေါ် အမြင်သုံးသပ်ချက်များကို ဆန်းစစ်သိရှိ နိုင်ပါသည်။
သင်ခန်းစာယူစရာအချက်များ
၁၊ စတင်ဖွဲ့စည်းခဲ့ချိန်မှ ယခုအထိ အဖွဲ့၏ ကြီးကြီးမားမား အောင်မြင်မှုများ
၂၊ စတင်ဖွဲ့စည်းခဲ့ချိန်မှ ယခုအထိ အဖွဲ့အနေဖြင့် ပြုလုပ်ခဲ့ဖူးသည့် ကြီးကြီးမားမားအမှားများ
၃၊ အဖွဲ့အနေဖြင့် ပြင်ဆင်လုပ်ဆောင်သင့်သည်ဟု ထင်မြင်သည့် ကိစ္စရပ်များ
၄၊ အဖွဲ့အနေဖြင့် စတင်ခဲ့ချိန်မှစ၍ သင်ခန်းစာယူစရာအချက်များ
၂။ အဖွဲ့အစည်း၏ မျှော်မှန်းအိပ်မက် (Vision) နှင့် ရပ်တည်ခံယူချက် (Mission Statement)
မဟာဗျူဟာတခုရေးဆွဲရာတွင် အဖွဲ့အစည်းတခုလုံး၏ မျှော်မှန်းချက်ပန်းတိုင် ၊ ရပ်တည်ခံယူချက် များကို ပြန်လည်ဆန်းစစ်သုံးသပ်ကြရသည်။ မရှိသေးလျှင် ရေးဆွဲကြရသည်။ အဖွဲ့အစည်းတခုလုံးရလို၊ ရောက်လိုသည့် မျှော်မှန်းချက်များနှင့် ရပ်တည်ခံယူချက်များအပေါ် အခြေခံပြီးမှသာလျှင် နှစ်အပိုင်းအခြားတခု စာ မဟာဗျူဟာကို ဆက်လက်စဉ်းစားကြရသည်။ မျှော်မှန်းချက်အိပ်မက် (vision) သည် အဖွဲ့အစည်း၏ လမ်းပြ ကြယ်နှင့်တူသည်။ အဖွဲ့အစည်းတခုလုံးသည် ယင်းလမ်းပြကြယ်နောက်မှ စိုက်လိုက်မတ်တပ်လိုက်မှသာလျှင် မိမိတို့ လိုလားသည့် ပန်းတိုင်နှင့် နီးစပ်မည်ဖြစ်သည်။ မျှော်မှန်းအိပ်မက်ရေးဆွဲရာတွင် သတိပြုရန်မှာ – မိမိအဖွဲ့ တွင်ရှိသည့်အရင်းအမြစ်များ၊ အဖွဲ့အနေဖြင့် သို့မဟုတ် အဖွဲ့တွင်ပါဝင်သူများ၏ ယခင်ကလုပ်ငန်းအတွေ့အကြုံ များ၊ အဖွဲ့အစည်းလုပ်ငန်း လုပ်ဆောင်ရမည့်ပတ်ဝန်းကျင်အခြေအနေများနှင့် အဖွဲ့အနေဖြင့် ဆောင်ကြဉ်းပေးလို သည့်အပြောင်းအလဲများကို သေချာစွာစဉ်းစားပြီးမှ မျှော်မှန်းအိပ်မက်ကို မက်လျှင် လက်တွေ့ပို၍ ကျနိုင်မည်။
ဘောလုံးအသင်းတသင်းကို စတင်တည်ထောင်သည့်နမူနာပေးရလျှင် တည်ထောင်သူများအနေဖြင့် မြို့နယ်၊ တိုင်းအဆင့်မှ ဘောလုံးကန်ကောင်းသည့်သူများနှင့် ဖွဲ့စည်းထားနိုင်သည့်အသင်းတသင်း၏ မျှော်မှန်းအိပ်မက်မှာ နိုင်ငံအဆင့်ကို ကျော်လွန်၍ ကမ္ဘာ့ကျော် ဘောလုံးအသင်းတသင်းအဖြစ် မျှော်မှန်းအိပ်မက်မက်မည်ဆိုလျှင် အဖွဲ့ ၏ နည်းပြသည် ယခင်ကမ္ဘာကျော်လက်ရွေးစင်အသင်းများတွင် ပါဝင်ဖူးသူ သို့မဟုတ် ပါဝင်သူကို ငှားရမ်းနိုင် လျှင်သော်လည်းကောင်း၊ အဖွဲ့အနေဖြင့် အမှန်တကယ်ပင် နိုင်ငံ၏ ဘောလုံးလောကအတွက် အပြောင်းအလဲများ ကို ဆောင်ကြဉ်းနိုင်မည်ဟု ယုံကြည်ချက်ရှိ၊မရှိတို့ဖြင့် သေချာစွာဆန်းစစ်ရန် လိုအပ်သည်။ မျှော်မှန်းအိပ်မက် မက်မည်ဆိုလျှင် လက်တွေ့ကျပြီး ပါဝင်သည့်အသင်းသားများသာမက အားပေးပံ့ပိုးလိုသူများအနေဖြင့်ပါ ယုံကြည်သည့်မျှော်မှန်းချက်မျိုးဖြစ်ပါလိမ့်မည်။
အဖွဲ့အစည်း၏ ရပ်တည်ခံယူချက် (mission statement) မှာမူ ယင်းပန်းတိုင်ကို ရောက်ရှိစေရန်အတွက် အဖွဲ့အစည်းအနေဖြင့် လုပ်ဆောင်မည့်လုပ်ငန်း (Business) ရပ်တည်လုပ်ဆောင်မည့်ရည်ရွယ်ချက် (Purpose) နှင့် တန်ဖိုးထားမှုများ ( values) ကို ဖော်ပြသည်။ နောက်တနည်းမှာ အဖွဲ့အစည်းအကြောင်း (Who are you?)၊ မည်သည့်အတွက် ဖွဲ့စည်းလုပ်ဆောင်နေသည် (Why do you exist?)၊ မည်သည့်လုပ်ငန်းများကို လုပ်ဆောင်နေ သည် (What do you do?)၊ မည်သူများအတွက် လုပ်ဆောင်နေသည် (Whom do you serve?) တို့ကို ရှင်းပြ၍ ရေးသားကြသည်။ အောက်ဖော်ပြပါ နိုင်ငံတကာအစိုးရအဖွဲ့အစည်း နှစ်ဖွဲ့၏ ရပ်တည်ခံယူချက်များကို နမူနာအနေဖြင့် ကြည့်နိုင်ပါသည်။
အပြည်ပြည်ဆိုင်ရာ ကယ်ဆယ်ရေး ကော်မတီ (IRC) သည် ပဋိပက္ခနှင့် ဘေးအန္တရာယ်များကြောင့် ဘဝနှင့် အသက်မွေး ဝမ်းကျောင်းလုပ်ငန်းများ ပျက်စီးသွားသူများအား အသက်ကယ်ရန်၊ ပြန်လည် ထူထောင်နိုင်ရန်၊ ထို့အပြင် မိမိတို့၏ အနာဂတ်ကို မိမိတို့ကိုယ်တိုင်ထိန်းချုပ်နိုင်ရန် ကူညီပေးရန် ရည်ရွယ်လုပ်ဆောင်လျက် ရှိသည်။https://www.rescue.org/what-we-do
ရံဖန်ရံခါတွင် အဖွဲ့အစည်းများသည် မူလဖွဲ့စည်းတည်ထောင်စဉ်က လုပ်ဆောင်ရန် ချမှတ်ခဲ့သည့် ပန်းတိုင်၊ ခံယူရပ်တည်ချက်များကို အခြေအနေ၊ အချိန်အခါအရ ပြင်ဆင်ပြောင်းလဲခြင်း၊ ဖြည့်စွက်ရခြင်းတို့လည်း ရှိတတ်သည်။ ၂.၂ မျှော်မှန်းချက်အိပ်မက် (Vision Statement)နှင့် ၂.၃ ရပ်တည်ခံယူချက်ရေးသားနည်း (Mission Statement) များတွင် အသေးစိတ်ရှင်းလင်းပြီးဖြစ်သည့်အတွက် ရေးနည်းများကို ထပ်မံမဖော်ပြတော့ပါ။ လာမည့် သုံးနှစ်တာ ကာလအတွက် အဖွဲ့အနေဖြင့် ရောက်ရှိလိုသည့် မဟာဗျူဟာပန်းတိုင်များသည် မျှော်မှန်းချက် အိပ်မက်နှင့် လမ်းမလွဲရန် လိုအပ် သကဲ့သို့ ရပ်တည်ခံယူချက်ပါ ဦးတည်သူများ၊ လုပ်ငန်းများ ကို ဖော်ဆောင်ခြင်း မျိုးဖြစ်ရန် လိုအပ်မည်။ ဆိုလို သည်မှာ မိမိသွားမည့်နေရာသည် မြစ်ကြီးနားမြို့ဟုဆိုပြီး ရန်ကုန် မှစတင်ထွက်ခွာခဲ့လျှင် လမ်းကြောင်းသည် မြစ်ကြီးနားသို့ ဦးတည်သည့်လမ်းကြောင်းမျိုးဖြစ်ရန်လိုအပ်မည်။ ထိုသို့မဟုတ်ပဲ သွားမည့် နေရာမှာ မြစ်ကြီးနား ဟုဆို၍ ရန်ကုန်မှထွက်ခွာပြီး ပုသိမ်သို့ရောက်နေသည်ဆိုလျှင် မြစ်ကြီးနားမြို့သို့ သွားမည့် ခရီးစဉ်အတွက် မေးခွန်းထုတ်ခံရမည်ဖြစ်သည်။
၃။ အဖွဲ့အစည်း၏ စံတန်ဖိုးများ (values)၊ ယုံကြည်ချက်များ (Beliefs)၊ လမ်းညွှန်မူဝါဒများ (Guiding Principles)
အဖွဲ့အစည်း၏ စံတန်ဖိုး၊ယုံကြည်ချက်နှင့် လမ်းညွှန်မူဝါဒများအားလုံးကို မဖြစ်မနေထည့်သွင်းရေးဆွဲရန် မလိုအပ်ပါ။ သို့သော် အဖွဲ့အနေဖြင့် မိမိတို့မျှော်မှန်းအိပ်မက်များ၊ ရပ်တည်ခံယူချက်များနှင့် အဖွဲ့၏လုပ်ငန်းများ ကို မည်သို့လုပ်ဆောင်မည်ဆိုသည့် လမ်းညွှန်မူဝါဒကိုလည်း ထည့်သွင်းစဉ်းစားလျှင် အဖွဲ့ဝင်များအနေဖြင့် အဖွဲ့အစည်းအပေါ် သက်ဝင်ယုံကြည်မှုပို၍ ဖြစ်ထွန်းစေနိုင်သကဲ့သို့ အဖွဲ့ဝင်များအားလုံးအကြား အသင်းအဖွဲ့ စိတ်ဓာတ်မျိုး ပို၍ဖြစ်ထွန်းစေနိုင်မည်။လမ်းညွှန်မူဝါဒများနှင့် ပတ်သက်၍ အပိုင်း – ၂ ၂.၃ တွင် အသေးစိတ် ဆွေးနွေးတင်ပြခဲ့ပြီးဖြစ်ပါသည်။
လမ်းညွှန်မူဝါဒများကဲ့သို့ပင် စံတန်ဖိုးများနှင့် ယုံကြည်ချက်များကလည်း အဖွဲ့၏ အခြားအဖွဲ့အစည်းများနှင့် မတူညီသည့်အချက်များကို နားလည်နိုင်စေပြီး မိမိတို့အဖွဲ့အပေါ် ဂုဏ်ယူစရာ၊ တိုင်းတာကြည့်စရာ ချိန်ထိုးကြည့် စရာ စံနှုန်းများလည်း ဖြစ်စေနိုင်ပါသည်။ သို့သော် လမ်းညွှန်မူဝါဒဖြစ်စေ၊ စံတန်ဖိုးလက်တွေ့ဖော်ဆောင်ရန် နေ့စဉ်လုပ်ငန်းများ လုပ်ကိုင်ဆောင်ရွက်ရာတွင် မည်သို့သောအပြုအမူများကို ပြုမူနေထိုင်ရမည်ဆိုသည့်အချက် များပါဝင်သင့်ပြီး တနည်းဆိုရလျှင် ယင်းအပြုအမူများကို လိုက်နာကျင့်သုံးနေထိုင်ကြခြင်းဖြင့် လမ်းညွှန်မူဝါဒ များကို လိုက်နာလုပ်ဆောင်နေပါသည်ဟု အာမခံချက်ပေးရာလည်း ရောက်စေပါသည်။ ဥပမာ – အဖွဲ့အနေဖြင့် ဘက်မလိုက်မှု (unbiased) မူဝါဒကို လမ်းညွှန်မူဝါဒတွင် ထည့်သွင်းထားလျှင် ဘက်မလိုက်မှုမူဝါဒကို လက်တွေ့လုပ်ငန်းစီမံချက်များ အကောင်အထည်ဖော်ရာတွင် လိုက်နာကျင့်သုံးမည်ကို သေချာစွာစဉ်းစား၍ နေ့စဉ်လုပ်ငန်းများ၊ လုပ်ဆောင်ချက်များတွင် လုပ်ဆောင်ရမည်။ လူ့အခွင့်အရေးမြှင့်တင် ရေးလုပ်ငန်းများ လုပ်ဆောင်နေပြီး လူ့အခွင့်အရေးချိုးဖောက်မှုများကို မှတ်တမ်းတင်နေသည့် အဖွဲ့အစည်းတခု ဖြစ်လျှင် လူ့အခွင့်အရေးချိုးဖောက်မှုကို ကျူးလွန်သူမှာ အဖွဲ့အစည်းနှင့် ဆက်ဆံရေးကောင်းသည့်အဖွဲ့အစည်း တခုမှတဦးဦး သို့မဟုတ် နောက်ဆက်တွဲ အရေးယူမှုများအား ပြုလုပ်နိုင်သည့် အာဏာပိုင်အဖွဲ့အစည်းမှ တဦးဦး က ကျူးလွန်ခြင်းဖြစ်ပါက မည်သို့အရေးယူလုပ်ဆောင်မည်ကို လက်တွေ့ကျင့်သုံးမည့်နည်းလမ်းများကိုပါ ထည့်သွင်းစဉ်းစား၍ လုပ်ထုံးလုပ်နည်းများကိုပါ ထည့်သွင်းရေးဆွဲသင့်သည်။ စံတန်ဖိုးများ၊ ယုံကြည်ချက်များ ထည့်လျှင်လည်း အလားတူပင် အဖွဲ့အစည်း၏ နေ့စဉ်ဘဝတွင် မည်သို့လိုက်နာကျင့်သုံးမည်ဆိုသည်ကိုပါ ထည့်သွင်းသင့်သည်။
