အဖွဲ့အစည်းတခုအတွက် ဖွဲ့စည်းပုံရေးဆွဲခြင်း
၂.၆ ဖွဲ့စည်းပုံရေးဆွဲခြင်း
ဖွဲ့စည်းပုံဆိုသည်မှာ အဖွဲ့အစည်းတခုကို ပြဋ္ဌာန်းဖော်ပြသည့် တရားဝင် စာတမ်းတခုပင်ဖြစ်သည်။ မြန်မာဝေါဟာရ တွင် ဖွဲ့စည်းပုံဟု ခြုံ၍ ခေါ်ဝေါ်ကြသော်လည်း အင်္ဂလိပ် ဝေါဟာရတွင်မူ organization’s constitution, articles of associations နှင့် organization’s charter ဆိုသည့် အသုံးအနှုံးအမျိုးမျိုးရှိသကဲ့သို့ သုံးစွဲပုံမှာလည်းအနည်းငယ်ကွာခြားသည်။ “Articles of Association (AoA) အဖွဲ့အစည်းဖွဲ့စည်းမှုဆိုင်ရာ ဥပဒေအပိုဒ်များ” ဆိုသည့်အသုံးအနှုံးကို ကုမ္ပဏီအဖွဲ့အစည်းများ မှတ်ပုံတင်ရာတွင် အသုံးများတတ်ပြီး အဖွဲ့အစည်း ၏ အဖွဲ့တွင်းလည်ပတ်မည့်ပုံစံကို အဓိကချမှတ်ထားသည့် ဥပဒေကြောင်းဆိုင်ရာ မှတ်တမ်းတခုလည်း ဖြစ်သည်။ အချို့အရပ်ဘက်အဖွဲ့အစည်းများတွင်လည်း အသင်းအဖွဲ့ ဖွဲ့စည်းရာတွင် AoA ရေးဆွဲဖွဲ့စည်းကြသည်။ Charter ဆိုသည့်အသုံးအနှုံးကိုလည်း ဖွဲ့စည်းပုံကဲ့သို့ပင် အဖွဲ့အစည်းအမျိုးမျိုး၏ စည်းမျဉ်း စည်းကမ်း၊ဖွဲ့စည်းပုံနှင့် လုပ်ပိုင်ခွင့်အာဏာအမျိုးမျိုးကို ပြဋ္ဌာန်းသတ်မှတ်ဖော်ပြရာတွင် အသုံးပြုကြသည်။ အထူးသဖြင့် မြူနီစပယ်အဖွဲ့များနှင့် ကျောင်းအဖွဲ့အစည်းများတွင် အသုံးများသည်ကို တွေ့ရသည်။
ဖွဲ့စည်းပုံ constitution သည် အဖွဲ့အစည်းကို အုပ်ချုပ်စီမံမှုပြုလုပ်မည့်ပုံစံနှင့် အဖွဲ့အစည်း၏ စည်းမျဉ်းစည်းကမ်းများအားလုံးကို ချမှတ် ပြဋ္ဌာန်းပေးထားသည့် အဖွဲ့အစည်းအတွက် အရေးအပါဆုံးစာတမ်းတခုလည်းဖြစ်သည်။ အဖွဲ့အစည်းဆိုင်ရာ အခြေခံ အချက်အလက်များ၊ အခြားအဖွဲ့အစည်းများနှင့်မတူညီသည့်အချက်များ၊ အဖွဲ့ အစည်း၏ ဒဿနနှင့် မျှော်မှန်းချက်ပုံရိပ်များကိုလည်း ဖော်ပြကြသည်။ အဖွဲ့အစည်းကို မည်သူများက မည်သို့ တာဝန်ယူပြီး မည့်သည့်ရည်ရွယ်ချက်များဖြင့် လုပ်ကိုင်ဆောင်ရွက်မည်၊ မည်သူတို့နှင့် မည်သည့် ခံယူရပ်တည်ချက်များ၊ တန်ဖိုးထားမှုများနှင့်လုပ်ဆောင်မည်ကိုလည်း ဖော်ပြသည်။
ဖွဲ့စည်းပုံတွင် ပါဝင်သည့် အပိုဒ်/အခန်းများ
ဖွဲ့စည်းပုံတခုတွင် ပါဝင်သည့် အစိတ်အပိုင်းများကို အပိုဒ်များ articles ဟုခေါ်ဝေါ် သည်။ ဖွဲ့စည်းပုံများရေးဆွဲရာတွင် များသောအားဖြင့် ပါဝင်သည့် အခြေခံ အပိုဒ်/အခန်းများ တူကြသော်လည်း အားလုံးကို ထည့်သွင်းရေးဆွဲရန်မလိုအပ်ချေ။ မိိမိတို့အဖွဲ့အစည်းအတွက် လိုအပ်မည့်အပိုဒ်/အခန်းများကို လိုသလို ထည့်သွင်းရေးဆွဲနိုင်သည်။ အောက်ဖော်ပြပါအပိုဒ်/အခန်းများ သည် အဖွဲ့အစည်းတခုတွင် ပါဝင်သည့်အပိုဒ်/အခန်းများဖြစ်ကြပြီး အချို့မပါရှိသည့်အပိုဒ်/အခန်းများကိုလည်း လိုအပ်မည်ထင်ပါက ထပ်မံဖြည့်စွက်ရေးဆွဲနိုင်ပါသည်။
နိဒါန်း (Preamble) –
နိဒါန်းသည် အဖွဲ့အစည်းကို မိတ်ဆက်သည့် ဖော်ပြချက်ဖြစ်သည်။ အဖွဲ့အစည်းကို မည်သို့ ဖွဲ့စည်းခဲ့သည်နှင့် ရည်ရွယ်ချက်ကိုပါ ထည့်သွင်းဖော်ပြလေ့ရှိသည်။ နိဒါန်းကို အပိုဒ်အနေဖြင့် မတွက်သည့်အတွက် အပိုဒ်များ မစတင်မီ ဖွဲ့စည်းပုံ၏အစတွင်ထားသည်။
ဥပမာ –
“သစ်တောများပြုန်းတီးမှုနှင့် မြို့ပြနှင့်ကျေးလက်ဒေသများတွင် အရိပ်ရအပင်များ ခုတ်ပစ်မှုကြောင့် သဘာဝ ပတ်ဝန်းကျင်ပျက်စီးခြင်းနှင့် ရာသီဥတုဆိုးရွားလာမှု အခြေအနေအပေါ် စိုးရိမ်လာသည့် မကွေးတိုင်းအတွင်းရှိ ရပ်ရွာများမှ လူထုများစွာ တက်ကြွစွာ ပူးပေါင်း၍ Love Our Trees (LOT) – သစ်ပင်ချစ်သူများအဖွဲ့ ကို ဖွဲ့စည်းခဲ့ကြသည်။ Love Our Trees (LOT) သည် ဒေသခံလူထုများကို မိမိတို့၏ သဘာဝပတ်ဝန်းကျင် ထိန်းသိမ်းရန်အတွက် သစ်ပင်စိုက်ပျိုးမှု၊စနစ်တကျမည်သို့ ခုတ်ရန်နှင့် ရေရှည်တည်တံ့နိုင်သည့် သဘာဝ ပတ်ဝန်းကျင်ဂေဟစနစ်များကို ထိန်းသိမ်းနိုင်ရန်နည်းလမ်းများကို သင်တန်းပေးခြင်း၊ ပညာပေးခြင်းနှင့် သစ်ပင် များပြန်လည်စိုက်ပျိုးခြင်းတို့ကို စနစ်တကျလုပ်ဆောင်ကြရန်ရည်ရွယ်ဖွဲ့စည်းခဲ့ခြင်းဖြစ်သည်။”
၁) အဖွဲ့အစည်းအမည် – အဖွဲ့အစည်း၏ အပြည့်အစုံအမည်နှင့် အသုံးပြုသည့် အတိုကောက်အမည် ဘာလဲ?
၂) ရုံးတည်နေရာ – ဌာနချုပ်ကို မည်သည့်နေရာတွင် ထားရှိပြီး ရုံးခွဲများရှိပါသလား?
၃) အမှတ်တံဆိပ်၊ သင်္ကေတ (Emblem) – အဖွဲ့အစည်း၏ အမှတ်တံဆိပ်၊သင်္ကေတက ဘာလဲ? ဖွဲ့စည်းပုံတွင် ဖော်ပြနိုင်ပြီး သို့မဟုတ် ပထမစာမျက်နှာ၏ထိပ်တွင် ထားနိုင်သည်။
၄) ရပ်တည်ခံယူချက် (Mission Statement) – အဖွဲ့အစည်း၏ ရပ်တည်ခံယူချက်က ဘာလဲ (ရေးနည်းကို ဖော်ပြပေးထားပြီးဖြစ်သည်။)
၅) အဖွဲ့အစည်းအမျိုးအစား – အရပ်ဘက်အဖွဲ့အစည်း၊ ဒေသခံ အစိုးရမဟုတ်သည့်အဖွဲ့၊ လူထု အခြေပြုအဖွဲ့အစည်း၊ လူမျိုးစုအခြေပြု အဖွဲ့အစည်း သို့မဟုတ် စေတနာ့ဝန်ထမ်းအဖွဲ့အစည်းမျိုး စသဖြင့် ဘယ်လိုအမျိုးအစားလဲ?
၆) အဖွဲ့အစည်း ရည်မှန်းချက်နှင့် ရည်ရွယ်ချက်များ (Goals and Objectives/Aims) – အဖွဲ့အစည်းက မည်သည့်ပန်းတိုင်၊ရည်မှန်းချက်များကို လုပ်ဆောင်အောင်မြင်လိုသလဲ? အဓိက ရည်ရွယ်ချက်များ ကဘာတွေလဲ?
၇) အဖွဲ့အစည်းတန်ဖိုးများ (Organizational Values) – အဖွဲ့အစည်းအတွက် အရေးပါသည့် တန်ဖိုးထားမှုများက ဘာတွေလဲ? ဥပမာ – နွမ်းပါးသော/လိုအပ်ချက်များသောသူများကို တခြား သူများနှင့် တူညီသော အခွင့်အရေးရရှိစေအောင် လုပ်ဆောင်ပေးချင်တာလား။ ပစ်ပယ်ခံထားရ သူများ/ အမျိုးသမီးများ၏ အသံကို ဖော်ထုတ်ရေးလား။ တန်ဖိုးအစား ရည်မှန်းချက်များ အဖြစ်ဖြင့်လည်း ဖော်ပြနိုင်သည်။
၈) လုပ်ဆောင်မည့်နည်းဗျူဟာ (Methodology) – ရည်မှန်းချက်များနှင့် ရည်ရွယ်ချက်များကို မည်သို့သော နည်းလမ်းများဖြင့် လုပ်ဆောင်မည်နည်း။ အဖွဲ့အစည်းသည် မိတ်ဖက်များ၊ ရပ်ရွာ ခေါင်းဆောင်များနှင့် ပူးပေါင်းသည့်နည်းလမ်းဖြင့် သို့မဟုတ် လူများ၏ အခွင့်အရေးများကို သိရှိစေရန် အသိပညာပေးသည့်နည်းလမ်းဖြင့် လုပ်ဆောင်မည်လား။ နည်းဗျူဟာကို ရည်မှန်းချက်တွင် တပါတည်း ဖော်ပြထားပြီးဖြစ်ပါက ထပ်မံဖော်ပြရန် မလိုအပ်ပါ။
၉) အဖွဲ့ဝင်ဖြစ်ခြင်း (Membership) – အဖွဲ့အစည်းသည် အဖွဲ့ဝင်များဖြင့် ဖွဲ့စည်းထားသည့် အဖွဲ့အစည်းဖြစ်ပါက အသင်းဝင်များဖြစ်ရန် ချမှတ်ထားသည့် စည်းမျဉ်း၊ မူဝါဒများ ရေးဆွဲချမှတ် ထားရန် လိုအပ်သည်။ အဖွဲ့အစည်းတွင် အဖွဲ့ဝင်ဖြစ်ခြင်းကြောင်း မည်သည့်အခွင့်အရေးများရရှိပြီး မည်သည့်တာဝန်ဝတ္တရားများကို လုပ်ဆောင်ရန်လိုအပ်မည်လဲ။
မှတ်ချက် – အဖွဲ့အစည်းအများစုသည် “အဖွဲ့ဝင်” ဟုဆိုသည့်အသုံးအနှုံးနှင့် စတင်တည်ထောင်စဉ်က ပါဝင်သူ/ “တည်ထောင်စဉ်ကပါဝင်သူ (Founder)” များကို အတူတူကဲ့သို့ အသုံးပြုလေ့ရှိကြသည်။ တည်ထောင်သူများသည် အဖွဲ့အစည်းကို ဖွဲ့စည်းရန် အကူအညီပေးသူများဖြစ်ပြီး အဖွဲ့အစည်း ဖွဲ့စည်းဖြစ်ပေါ်မှုအတွက် ပံ့ပိုးကူညီခဲ့သူ ဖြစ်သည်။ သို့သော် အသင်းဝင်/အဖွဲ့ဝင်သည် ပုံမှန်အနေဖြင့် အဖွဲ့အစည်းအတွက် ငွေကြေး၊ ပစ္စည်း၊ သို့မဟုတ် လူ/အချိန်/စေတနာဝန်ထမ်းအဖြစ် ပံ့ပိုးသူများ ဖြစ်သည်။ အသင်းဝင်/အဖွဲ့ဝင် အဖြစ်လက်ခံရာတွင် စည်းမျဉ်းစည်းကမ်းများ ချမှတ်ထားရှိတတ်ကြ ပြီး ယင်းစည်းမျဉ်းစည်းကမ်းများကို လိုက်နာရသည်။ ယင်းမူဝါဒ စည်းမျဉ်းစည်းကမ်းများကို ဖွဲ့စည်းပုံ တွင် အသေးစိတ်ဖော်ပြရန်လည်း လိုအပ်သည်။
- အဖွဲ့ဝင်အမျိုးအစား (Types of Members) – ဂုဏ်ထူးဆောင် (Honorary) အဖွဲ့ဝင် နှင့် သာမန် အဖွဲ့ဝင်စသဖြင့် သတ်မှတ်ထားရှိမည်လား။ သို့မဟုတ် အဖွဲ့ဝင်တမျိုးတစားတည်း သတ်မှတ်မည် လား။
- အဖွဲ့ဝင်ဖြစ်ရန် လိုအပ်ချက်များ (Eligibility) – အဖွဲ့ဝင်ဖြစ်ရန် သို့မဟုတ် အဖွဲ့ဝင်တဦး အနေဖြင့် လိုက်နာလုပ်ဆောင်ရန် လိုအပ်သည့်အချက်များ
- အဖွဲ့ဝင်များအား ပေးမည့်အခွင့်အရေးများ (Rights) – အဖွဲ့ဝင်များအနေဖြင့် မည်သည့်အခွင့် အရေးများ ရရှိနိုင်သနည်း။ဥပမာ – အဖွဲ့အစည်း၏ အရင်းအမြစ်များကို အသုံးပြုနိုင်ခြင်း၊ အလုပ် အကိုင်ရရှိနိုင်ခြင်း
- တာဝန်များ (Obligations) – အဖွဲ့ဝင်များအနေဖြင့် လုပ်ဆောင်ရမည့်တာဝန်ဝတ္တရားများ ဥပမာ – အဖွဲ့ဝင်ကြေးပေးရန်၊ စေတနာဝန်ထမ်းအဖြစ် လုပ်ဆောင်ပေးရန် စသဖြင့်
- အဖွဲ့ဝင်အဖြစ်မှ ရပ်နားခြင်း (Termination of Membership) – အဖွဲ့ဝင်အဖြစ်မှ မည်သည့် အခြေအနေမျိုးတွင် ရပ်စဲ/ရပ်နားစေမည်နည်း။ လုပ်ထုံးလုပ်နည်းများ ပြဋ္ဌာန်းဖော်ပြရန် လိုအပ်မည်ဖြစ်သည်။
၁၀) အဖွဲ့အစည်းဖွဲ့စည်းပုံ – သင့်အဖွဲ့အစည်းအတွင်းပါဝင်သည့် ဌာန/အစုအဖွဲ့တခုချင်းစီအတွက် အောက်ပါ မေးခွန်းများကို ဖြေဆိုကြည့်ပါ။
- ဌာန/အစုအဖွဲ့၏ ရည်ရွယ်ချက် – ယင်းဌာန/အစုအဖွဲ့၏အခန်းကဏ္ဍက ဘာလဲ။ အုပ်ချုပ်မှု၊ ခေါင်းဆောင်မှု၊ စီမံခန့်ခွဲမှု၊ အုပ်ချုပ်ရေး သို့မဟုတ် အထောက်အပံ့ပေးမည့်အဖွဲ့ ဖြစ်သလား။
- ပါဝင်သူ/အဖွဲ့ဝင်/ဝန်ထမ်းများ – မည်သူများနှင့် ဖွဲ့စည်းထားသနည်း။ ဘယ်နှစ်ယောက်ပါဝင် ပါသလဲ။ အခြားအစုအဖွဲ့/ဌာနများမှ ရွေးချယ်တင်မြှောက်ထားခြင်းလား။ မည်သို့ရွေးချယ် သနည်း။ သက်တမ်းကာလမည်မျှရှိသနည်း။ ပြန်လည်ရွေးချယ်ခံနိုင်ခွင့်ရှိသလား။ ခန့်ထားသည် ဆိုလျှင် မည်သူများ ကမည်သို့ခန့်ထားပါသလဲ။
- အစည်းအဝေးကြိမ်ရေ/ကျင်းပချိန် – မည်သည့်အချိန်တွင် သို့မဟုတ် အကြိမ်ရေမည်မျှ သွားမည်နည်း။
- ဆုံးဖြတ်ချက်ချမှု – ဆုံးဖြတ်ချက်ချရန်အတွက် မည်သူ့တွင် အခွင့်အာဏာများရှိသနည်း။
- တာဝန်များ – ဤအစုအဖွဲ့များ၏တာဝန်များကဘာလဲ။ မည်သူက ကြီးကြပ်အုပ်ချုပ်မည်နည်း၊ တာဝန်ခံမည်နည်း။
- အခွင့်အာဏာလုပ်ပိုင်ခွင့်များ – ဌာန/အစုအဖွဲ့ကိုရပ်ဆိုင်းခြင်း၊ ဘဏ္ဍာရေးသို့မဟုတ် ဖွဲ့စည်းပုံ များကို အတည်ပြုခြင်း၊ ဖွဲ့စည်းပုံပြင်ဆင်ပြောင်းလဲခြင်း စသည့်အခွင့်အာဏာများ ရှိပါသလား။
- လုပ်ငန်းတာဝန်ပြီးဆုံးခြင်း – တာဝန်ထမ်းဆောင်သူတစ်ဦးသည် မည်သို့တာဝန်ပြီးဆုံး မည်နည်း၊ တာဝန်ထမ်းဆောင်မှုကို မည်သို့အဆုံးသတ်မည်နည်း။
၁၁) ဘဏ္ဍာရေး
- ဘဏ္ဍာငွေစာရင်းများ – ဘဏ္ဍာငွေစာရင်းများကို မည်သို့စီမံမည်နည်း။ လုပ်ထုံးလုပ်နည်း သတ်မှတ်ချက်၊ စာရင်းကိုင်နှင့် အစီရင်ခံစနစ် ရှိပါသလား။ ဘဏ္ဍာရေးစီမံခန့်ခွဲရန်အတွက် တာဝန်များကို ခွဲဝေထားပါသလား။
- စာရင်းစစ်များ – အဖွဲ့အစည်း၏ဘဏ္ဍာငွေကြေးသုံးစွဲမှုကို မည်သူက စာရင်းစစ်မည်နည်း။ အဖွဲ့အတွင်းစာရင်းစစ်ရှိသလား။ မည်သူက မည်သို့စစ်ဆေးပေးပါသနည်း။ မည်သည့်အချိန်တွင် မည်သို့လုပ်ကိုင်ပါသနည်း။
- ဝင်ငွေ – အဖွဲ့အစည်း၏ဝင်ငွေအရင်းအမြစ်များကို မည်သို့ရရှိပါသလဲ။ ရန်ပုံငွေရှာဖွေရေး တာဝန်ကို မည်သူလုပ်ဆောင်မည်နည်း။ အလှူငွေတောင်းခံခြင်း သို့မဟုတ် လက်ခံခြင်းဆိုင်ရာ မူဝါဒများ ရှိပါသလား။
၁၂) ပိုင်ဆိုင်မှု – အဖွဲ့အစည်းပိုင်ပစ္စည်းများကို လက်ခံသိမ်းဆည်းခြင်း၊ အသုံးပြုခြင်းနှင့် သုံးစွဲပြီးနောက် စနစ်တကျ စီမံခန့်ခွဲခြင်း၊ ပယ်ဖျက်ခြင်းတို့နှင့်ပတ်သက်ပြီး မည်သို့ပြုလုပ်မည်နည်း။
၁၃) အဖွဲ့အစည်းဖျက်သိမ်းခြင်း – လိုအပ်ပါက အဖွဲ့အစည်းကို မည်သို့ဖျက်သိမ်းမည်နည်း။ ဖျက်သိမ်းမည်ဆိုသည့် ဆုံးဖြတ်ချက်ကို မည်သူ(များ)က ချမည်နည်း၊ မည်သို့အခြေအနေမျိုးတွင် ထိုဆုံးဖြတ်ချက်ကို ဆွေးနွေးနိုင်သနည်း။ မည်သို့လုပ်ငန်းစဉ်များကို လိုက်နာရန် လိုအပ်မည်နည်း။
၁၄) ဖွဲ့စည်းပုံပါအချက်များအပေါ် အဓိပ္ပါယ်ဖွင့်ဆိုခြင်း – ဖွဲ့စည်းပုံတွင်ပါရှိသည့် အပိုဒ်တခုခု၊ စကားလုံး များအပေါ် အဓိပ္ပါယ်ပြန်ဆိုလုပ်ဆောင်ရာတွင် သေချာမှုမရှိပါက မည်သူများက မည်သို့ အဓိပ္ပါယ်ဖွင့်ဆို ဆုံးဖြတ်ပေးနိုင်မည်နည်း။
၁၅) ဖွဲ့စည်းပုံကို အတည်ပြုခြင်း – ဖွဲ့စည်းပုံကို ရေးဆွဲအတည်ပြုပြီးပါက မည်သည့်အဖွဲ့ သို့မဟုတ် မည်သူက အတည်ပြုသည်။ ထိုအဖွဲ့ သို့မဟုတ်ပါဝင်သူများနှင့် အတည်ပြုသည့်ရက်စွဲကို နောက်ဆုံးအပိုင်းတွင် ထည့်သွင်း ဖော်ပြနိုင်ပါသည်။
အထက်ဖော်ပြပါ အချက်များမှ ဖွဲ့စည်းပုံတွင် ထည့်သွင်းသင့်သည်ဟု ဆုံးဖြတ်သည့် အချက်အလက် များကို ရွေးချယ်ပြီးလျှင် အဖွဲ့နှင့်ဆီလျော်မှုရှိသည့်အခြေအနေများကို ဆွေးနွေးဆုံးဖြတ်ပြီး စတင် ရေးဆွဲနိုင်ပြီ ဖြစ်သည်။ပုံမှန်အားဖြင့် ဖွဲ့စည်းပုံတခုတွင် အပိုဒ်များပါဝင်ပြီး ယင်းအပိုဒ်များသည် ဖွဲ့စည်းပုံ၏ အစိတ်အပိုင်း များပင်ဖြစ်ကြသည်။ အပိုဒ်တစ်ခုတွင်လည်း အပိုဒ်ခွဲများပါဝင်နိုင်သည်။ ဖွဲ့စည်းပုံတွင် ထည့်သွင်းလိုသည့် အချက်အလက်များကိုမူ အသေးစိတ်ဆွေးနွေးရန်လိုအပ်သည်။ ဥပမာ – အဖွဲ့အစည်းကို ဖျက်သိမ်းခြင်းအပိုဒ်ကို ထည့်ရန်ဆုံးဖြတ်ပါက အားလုံးနှင့် သေချာစွာ ဆွေးနွေးပြီး မည်သည့်အခြေအနေမျိုးရှိခဲ့လျှင်၊ မည်သို့အဆင့်ဆင့် ဆောင်ရွက်ရမည်ဆိုသည်ကို ဆွေးနွေးဆုံးဖြတ်ပြီးမှ အများသဘောတူညီမှုဖြင့် ထည့်သွင်းသင့်သည်။
ဖွဲ့စည်းပုံရေးဆွဲရာတွင် သတိထားရမည့်အချက်များ
- အဖွဲ့အစည်း၏ ဖွဲ့စည်းပုံသည် အဖွဲ့အတွက် ပင်မအရေးကြီးသည့်လမ်းညွှန်တခုဖြစ်ပြီး ခဏ၊ခဏ မပြင်ဆင်သင့်ပါ။ ထို့ကြောင့် ပြင်ဆင်ပြောင်းလဲရန် လိုအပ်သည့်မူဝါဒများနှင့် လုပ်ငန်းဖော်ပြချက်များ ကို ထည့်သွင်းမထားသင့်ပါ။ ၎င်းတို့ကို ဖွဲ့စည်းပုံမှခွဲထုတ်၍ မကြာခဏ ပြန်လည်သုံးသပ်နိုင်သည့် အဖွဲ့အစည်း၏မဟာဗျူဟာမျိုးတွင် ထည့်သွင်းသင့်သည်။
- ဖွဲ့စည်းပုံတစ်ခုလုံးတွင် တိကျပြီး ရှေ့နောက်ညီစွာ ရေးသားရန်လိုအပ်သည်။ ဥပမာ၊ အပိုဒ်နှင့် အခွဲအပိုဒ်များတွင် နံပါတ်ကို အသုံးပြုလျှင် နံပါတ်၊ အက္ခရာကို သုံးလျှင် အက္ခရာစသဖြင့် စနစ် ကို အတူတူအသုံးပြုပါ။ ထည့်သွင်းဖော်ပြသည့် တာဝန်ရာထူးတစ်ခုစီအတွက်လည်း အချက်အလက် ကိုက်ညီအောင်ဖော်ပြပါ။
- အချက်အလက်များ ပြည့်စုံစွာ ရေးသားထားရန်လိုအပ်သည်။ ဖွဲ့စည်းပုံသည် အကျဉ်းချုပ်ပုံစံမျိုး မဖြစ်ဘဲ အသေးစိတ်ဖော်ပြထားလေလေ၊ အကောင်အထည်ဖော်ရာတွင် မရှုပ်ထွေးလေ ဖြစ်သည်။ ဥပမာ – ညွှန်ကြားရေးမှူးချုပ် (Executive Director) ကို မည်သို့ရွေးချယ်မည်ဆိုသည်နှင့်ပတ်သက်၍ လုပ်ငန်းစဉ်အဆင့်ဆင့်ဖြစ်သည့် မည်သူများက ဆုံးဖြတ်မည်၊ မည်သူများအနေဖြင့် ဆန္ဒမဲပေးနိုင်မည်၊ ဆန္ဒမဲမည်မျှရပါက ရွေးချယ်မည်။ (ဥပမာ – ရွေးချယ်ထားသည့်သူ အရေအတွက် ၃ ဦးမှ ဆန္ဒမဲ အများ ဆုံးရသူကို ရွေးမည်လား၊ သို့မဟုတ် ရွေးချယ်ထားသူ တဦးကို အုပ်ချုပ်စီမံမှုအဖွဲ့ဝင်ဦးရေ ၅ ဦး/၇ ဦး စသည်အနက်မှ ထက်ဝက်ကျော်သဘောတူလျှင် ရွေးချယ်ခန့်အပ်မည်လား စသည်ဖြင့်)၊ ထို့အတူ အုပ်ချုပ်စီမံမှုအဖွဲ့ (governance body)၏ သက်တမ်းကာလမည်မျှ၊ သက်တမ်းပြီးလျှင် မည်သို့ ဆက်လက်ဆောင်ရွက်မည် စသည့်အချက်များကို ထည့်သွင်းဖော်ပြသင့်သည်။
အဖွဲ့အစည်းဖွဲ့စည်းပုံ နမူနာ
LOVE OUR TREES (LOT)
သစ်ပင်ချစ်သူများအဖွဲ့၏ ဖွဲ့စည်းပုံ
နိဒါန်း – PREAMBLE
သစ်တောများပြုန်းတီးမှုနှင့် မြို့ပြနှင့်ကျေးလက်ဒေသများတွင် အရိပ်ရအပင်များ ခုတ်ပစ်မှုကြောင့် သဘာဝ ပတ်ဝန်းကျင်ပျက်စီးခြင်းနှင့် ရာသီဥတုဆိုးရွားလာမှု အခြေအနေအပေါ် စိုးရိမ်လာသည့် မကွေးတိုင်းအတွင်းရှိ ရပ်ရွာများမှ လူထုများစွာ တက်ကြွစွာ ပူးပေါင်း၍ Love Our Trees (LOT) – သစ်ပင်ချစ်သူများအဖွဲ့ ကို ဖွဲ့စည်းခဲ့ကြသည်။ Love Our Trees (LOT) သည် ဒေသခံလူထုများကို မိမိတို့၏ သဘာဝပတ်ဝန်းကျင် ထိန်းသိမ်းရန်အတွက် သစ်ပင်စိုက်ပျိုးမှု၊စနစ်တကျမည်သို့ ခုတ်ရန်နှင့် ရေရှည်တည်တံ့နိုင်သည့် သဘာဝ ပတ်ဝန်းကျင်ဂေဟစနစ်များကို ထိန်းသိမ်းနိုင်ရန်နည်းလမ်းများကို သင်တန်းပေးခြင်း၊ ပညာပေးခြင်းနှင့် သစ်ပင် များပြန်လည်စိုက်ပျိုးခြင်းတို့ကို စနစ်တကျလုပ်ဆောင်ကြရန်ရည်ရွယ်ဖွဲ့စည်းခဲ့ခြင်းဖြစ်သည်။
အပိုဒ် ၁ – အဖွဲ့အစည်းအမည်
၁။ အဖွဲ့အစည်းအမည်မှာ Love Our Trees (LOT) – သစ်ပင်ချစ်သူများအဖွဲ့ ဖြစ်သည်။
၂။ LOT ၏ရုံးတည်နေရာမှာ မကွေးမြို့တွင် ဖြစ်သည်။
၃။ LOT ၏သင်္ကေတမှာ ရပ်ရွာပြည်သူလူထုများ စုပေါင်းသစ်ပင်စိုက်နေသော ပုံဖြစ်သည်။
အပိုဒ် ၂ – အဖွဲ့အစည်းအကြောင်း
၁။ LOT သည် အစိုးရမဟုတ်သည့်၊ အမြတ်အစွန်းအတွက် လုပ်ဆောင်ခြင်းမဟုတ်သည့်၊ နိုင်ငံရေး မပါဝင်သည့်၊ မည်သည့်နိုင်ငံရေးပါတီနှင့်မှ ပတ်သက်မှုမရှိသည့် စေတနာ့ဝန်ထမ်းများနှင့်ဖွဲ့စည်း ထားသည့်အဖွဲ့အစည်း ဖြစ် သည်။
၂။ LOT သည် တရားဝင်မှတ်ပုံတင်ထားသည့်အဖွဲ့အစည်းတခုဖြစ်သည်။
အပိုဒ် ၃ – ရပ်တည်ခံယူချက်
Love Our Trees (LOT) သစ်ပင်ချစ်သူများအဖွဲ့ကို ၂၀၁၈ ခုနှစ်တွင် မကွေးတိုင်းအတွင်းမှ သဘာဝ ပတ်ဝန်းကျင် အရေးလှုပ်ရှားနေသူများ၊ ရပ်ရွာခေါင်းဆောင်များနှင့် စုစည်းတည်ထောင်ခဲ့သည်။ LOT အနေဖြင့် မကွေးတိုင်း အတွင်းရှိ ပြည်သူလူထုများအား သစ်ပင်များကို စနစ်တကျထိန်းသိမ်း၍ ခုတ်ထွင်ခြင်း၊ သဘာဝဂေဟစနစ်များ နှင့် သစ်ပင်များအကြောင်း ပညာပေးခြင်း၊ လူငယ်ခေါင်းဆောင်များအား သင်တန်းပေးခြင်းနှင့် အတူတကွ သစ်ပင်များစိုက်ပျိုးခြင်းတို့ကို ပြုလုပ်သည်။ ယင်းလုပ်ငန်းများကို LOTအနေဖြင့် ဒေသခံလူထုများ ပူးပေါင်း လုပ်ဆောင်ပြီး ဒေသခံလူထုအခြေပြုသစ်တောများနှင့် ရေဝေရေလဲထိန်းသိမ်းမှုပုံစံမျိုး ဖြစ်စေရန် စီမံ ဆောင်ရွက်သည်။
အပိုဒ် ၄ – ရည်ရွယ်ချက်ပန်းတိုင်များ
အဖွဲ့အစည်း၏ ရည်ရွယ်ချက်ပန်းတိုင်များမှာ –
၁။ ကျေးလက်လူထုအနေဖြင့် သဘာဝပတ်ဝန်းကျင်အခြေအနေဆိုင်ရာ အသိပညာများ တိုးတက်ပြီး ကိုယ်တိုင် ထိန်းသိမ်းစောင့်ရှောက်နိုင်စေရန်။
၂။ သက်ဆိုင်ရာ အာဏာပိုင်များအနေဖြင့် သဘာဝပတ်ဝန်းကျင်ဆိုင်ရာ ဥပဒေများကို ထုတ်ပြန်ရုံမျှမက အသက် ဝင်အောင်လုပ်ဆောင်ရန်အတွက် တိုက်တွန်းနိုးဆော်မှုများ ပြုလုပ်ရန်။
၃။ သစ်ပင်များကို စနစ်တကျ ထိန်းသိမ်းစီမံတတ်ပြီး ဒေသလူထုအခြေပြုသစ်တောများ၊ ရေဝေရေလဲထိန်းသိမ်း မှုများကို အသိပညာပေးပံ့ပိုးခြင်းဖြင့် ကျေးလက်လူထု၏ လူမှုစီးပွားရေးစနစ်တိုးတက်အောင်လုပ်ဆောင်ရန်။
၄။ သဘာဝပတ်ဝန်းကျင်ဆိုင်ရာ အတွေ့အကြုံများ၊ သတင်းအချက်အလက်များ မျှဝေသည့် ဆွေးနွေးပွဲများ၊ အသိပညာပေးမှုများမှတဆင့် မကွေးတိုင်းတတိုင်းလုံး ရေရှည်တွင် ပြန်လည်စိမ်းစိုလာအောင်လုပ်ဆောင်ရန် တို့ဖြစ်သည်။
အပိုဒ် ၅ – တန်ဖိုးများ (Values)
LOT သည် လုပ်ငန်းများဆောင်ရွက်ရာတွင် အောက်ပါတန်ဖိုးထားမှုများအတိုင်း ဆောင်ရွက်ပါမည်။ ၁။ မည်သူ့ကိုမျှ ခွဲခြားဆက်ဆံမှုမရှိခြင်း
၂။ LOT ၏လိုအပ်ချက်မဟုတ်ဘဲ ဒေသခံလူထု၏ လိုအပ်ချက်ကိုသာအခြေခံသည့် စီမံကိန်းများ ဆောင်ရွက်ခြင်း။
၃။ သဘာဝပတ်ဝန်းကျင်နှင့် လူထုအတွက် ရေရှည်အကျိုးရှိမည့် ပံ့ပိုးမှုများပေးခြင်း။
၄။ လူထုများကို မိမိတို့နေ့စဉ်လုပ်ဆောင်မှုများနှင့် သဘာဝပတ်ဝန်းကျင်အကြား ဆက်နွယ်မှုကို နားလည်လာစေရန် အတူတကွလုပ်ဆောင်၍ စွမ်းရည်မြှင့်တင်ပေးခြင်း
အပိုဒ် ၆ – ဖွဲ့စည်းပုံ
LOT ၏ ဖွဲ့စည်းပုံမှာ –
- ကွန်ဂရက် (Congress)
- ညွှန်ကြားရေးအဖွဲ့ (Board of Directors)
- အမှုဆောင်ဒါရိုက်တာ (Executive Director)
- စီမံခန့်ခွဲမှုအဖွဲ့ (Management Team)
- ပရောဂျက်/ရုံးဝန်ထမ်းများ
ပရောဂျက်နှင့် ရုံးဝန်ထမ်းများ၏ တာဝန်များကို ၎င်းတို့၏ အလုပ်ဖော်ပြချက်၊ စာချုပ်များနှင့် LOT ၏ ဝန်ထမ်းရေးရာမူဝါဒတွင်အသေးစိတ်ဖော်ပြထားသည်။
၆.၁ ကွန်ဂရက်စ်
၁။ ကွန်ဂရက်သည် LOT ၏လုပ်ငန်းရည်မှန်းချက်များ ထိရောက်အောင်မြင်စွာ ဆောင်ရွက်နိုင်စေရန် လမ်းညွှန်အကြံပေးမည့်အဖွဲ့ ဖြစ်သည်။
၂။ ကွန်ဂရက်သည် LOT ၏ အမြင့်ဆုံး အဖွဲ့အစည်း ဖြစ်သည်။
၃။ ကွန်ဂရက်၏ အဖွဲ့ဝင်များမှာ LOT ၏ လုပ်ငန်းများကို ထောက်ပံ့ကူညီသည့် ပတ်ဝန်းကျင် ထိန်းသိမ်းရေး တက်ကြွလှုပ်ရှားသည့်ခေါင်းဆောင်များနှင့် ရပ်ရွာခေါင်းဆောင်များဖြစ်ပြီး၊ LOT ၏ အဖွဲ့ဝင်မူဝါဒအရ ငွေကြေး ဆိုင်ရာ အထောက်အပံ့ပေးသူများ လည်းဖြစ်သည်။ အဖွဲ့ဝင်အဆင့်ကို နှစ်စဉ် အထွေထွေညီလာခံ အစည်း အဝေး (Annual General Meeting – AGM) တွင် ပြန်လည်စိစစ်ပြီး သုံးလအထက် အဖွဲ့ဝင်ကြေးမပေးသူ များအား အဆင့်လျှော့ချမည်ဖြစ်သည်။
၄။ ကွန်ဂရက်စ်သည် နှစ်စဉ် ဇန်နဝါရီလတွင် AGM ပြုလုပ်သည်။ ကွန်ဂရက်စ်အဖွဲ့ဝင် သုံးပုံတစ်ပုံ၏ တောင်းဆို ချက်ဖြင့် အထူးအစည်းအဝေး ပြုလုပ်နိုင်သည်။
၅။ ကွန်ဂရက်၏ တာဝန်များမှာ –
- ညွှန်ကြားရေးအဖွဲ့ခန့်အပ်ခြင်းကို အတည်ပြုပေးခြင်း
- ဖွဲ့စည်းပုံ နှင့် အဖွဲ့ဝင်ဆိုင်ရာမူဝါဒများ အတည်ပြုခြင်း။
- ယခင်နှစ်အတွင်း လုပ်ဆောင်ခဲ့သည့်လုပ်ငန်းများမှ ရရှိခဲ့သော အောင်မြင်မှုများကို မှတ်တမ်းတင်အတည်ပြုခြင်း။နှင့်
- လာမည့်နှစ်အတွက် လုပ်ငန်းအစီအစဉ်များရေးဆွဲရာတွင် အကြံဉာဏ်များပေးခြင်း။
၆။ ကွန်ဂရက်အဖွဲ့ဝင်အဖြစ်မှ ရပ်ဆိုင်းခြင်း
- အဖွဲ့ဝင်ကြေးသုံးလအထက် မပေးခြင်း
- ကွန်ဂရက်အဖွဲ့ဝင်အားလုံး၏ သုံးပုံနှစ်ပုံအနည်းဆုံး အတည်ပြုချက်ဖြင့် အဖွဲ့မှပယ်ချခြင်း။
- သေဆုံးခြင်း
- နှုတ်ထွက်ခြင်း
၆.၂ ညွှန်ကြားရေးအဖွဲ့ (Board of Directors)
၁။ ညွှန်ကြားရေးအဖွဲ့မှာ အဖွဲ့အစည်း၏လုပ်ငန်းများအတွက် ဦးဆောင်မှုပေးသည့်အဖွဲ့ဖြစ်သည်။
၂၊ ညွှန်ကြားရေးအဖွဲ့သည် ကွန်ဂရက်ထံ တာဝန်ခံရပြီး အမှုဆောင်ညွှန်ကြားရေးမှူးကို ကွပ်ကဲ ကြပ်မတ်သည်။
၃။ ညွှန်ကြားရေးအဖွဲ့၏ သက်တမ်းကာလမှာ တစ်နှစ်ဖြစ်ပြီး၊ အများဆုံး သုံးနှစ်တိုင်အောင် ပြန်လည် ရွေးချယ်ခန့်ထားနိုင်သည်။
၄။ ညွှန်ကြားရေးအဖွဲ့ဝင်များကို အဖွဲ့အစည်း၏ စီမံခန့်ခွဲမှုအဖွဲ့ကရွေးချယ်ပြီး AGM တွင် ကွန်ဂရက်က အတည်ပြုမည်။
၅။ ညွှန်ကြားရေးအဖွဲ့တွင် အဖွဲ့ဝင် ၇ ဦးပါရှိသည်။
၆။ ညွှန်ကြားရေးအဖွဲ့၏ တာဝန်ဝတ္တရားများမှာ –
- LOT ၏ နေ့စဉ်လုပ်ငန်းများတွင် မပါဝင်သည့် အဖွဲ့အစည်းပိုင်းဆိုင်ရာ ဆုံးဖြတ်ချက်များကို ချမှတ်ခြင်း။
- အဖွဲ့အစည်း၏ မူဝါဒများ၊ ဖွဲ့စည်းပုံ၊ အစီအစဉ်များ၊ မဟာဗျူဟာအစီအစဉ်နှင့် ငွေစာရင်းကို အတည်ပြုပေးခြင်း။
- ကွန်ဂရက်၏ နှစ်ပတ်လည် အထွေထွေအစည်းအဝေးကို စီစဉ်ကျင်းပပေးခြင်း။
- စီမံခန့်ခွဲမှုအဖွဲ့နှင့်ပူးပေါင်း၍ ငွေကြေးရှာဖွေထောက်ပံ့ခြင်း။
- ကွန်ဂရက်အစည်းအဝေးတခုနှင့်တခုအကြား LOT ၏ လုပ်ငန်းကိစ္စအဝဝကို ကြီးကြပ်ကွပ်ကဲပေးခြင်း။
- ကွန်ဂရက်မှ အတည်ပြုပေးနိုင်ရန်အတွက် လိုအပ်ပါက အဖွဲ့ဝင်ကြေးသတ်မှတ်ပေးခြင်းနှင့် ညှိနှိုင်းပေးခြင်းအပါအဝင် အဖွဲ့ဝင်များဆိုင်ရာမူဝါဒအားလုံးကို အဆိုပြုပေးခြင်း
- အဖွဲ့၏ ငွေကြေးစီးဆင်းမှုတွင် သိန်း ၁၀၀ ကျပ်အထက်ထိရှိပါက အတည်ပြုခြင်း။
- အဖွဲ့အစည်းကို လုပ်ငန်းစစ်ဆေးခြင်း၊ ကွပ်ကဲကြပ်မတ်ခြင်းနှင့် အကဲဖြတ်ခြင်း။
- ညွှန်ကြားရေးအဖွဲ့အစည်းအဝေးများကို တစ်လတစ်ကြိမ် ကျင်းပရမည်။
၇။ ညွှန်ကြားရေးအဖွဲ့ဝင်တာဝန်မှ ရပ်နားခြင်း –
- ကွန်ဂရက်စ်၏ သုံးပုံနှစ်ပုံအနည်းဆုံး သဘောတူညီချက်ဖြင့် ပယ်ဖျက်ခြင်း။
- သေဆုံးခြင်း
- နှုတ်ထွက်ခြင်း
၆.၃ အမှုဆောင်ညွှန်ကြားရေးမှူး
၁။ အမှုဆောင်ညွှန်ကြားရေးမှူးသည် အဖွဲ့အစည်း၏ နေ့စဉ်လုပ်ငန်းများကို ဦးဆောင်မှုပေးရသူဖြစ်သည်။
၂။ အမှုဆောင်ညွှန်ကြားရေးမှူးသည် ညွှန်ကြားရေးအဖွဲ့ထံတာဝန်ခံရပြီး စီမံခန့်ခွဲမှုအဖွဲ့၏ အကြီးအကဲ ဖြစ်သည်။
၃။ အမှုဆောင်ညွှန်ကြားရေးမှူးကို ညွှန်ကြားရေးအဖွဲ့က ကာလအကန့်အသတ်မရှိသည့် သဘောတူ စာချုပ် (open contract) ဖြင့် ခန့်အပ်ပြီး လုပ်ငန်းဆောင်ရွက်မှုအပေါ် ညွှန်ကြားရေးအဖွဲ့မှ ကျေနပ်နေသရွေ့ ခန့်အပ်ထားနိုင်သည်။
၄။ အမှုဆောင်ညွှန်ကြားရေးမှူး၏ တာဝန်ဝတ္တရားများမှာ –
- အဖွဲ့အစည်း၏ မူဝါဒများ အကောင်အထည်ဖော်ခြင်း။
- LOT ကိုယ်စား စာချုပ်စာတမ်းများကို လက်မှတ်ထိုးခြင်း။
- ဌာနနှင့် စီမံကိန်း ဦးဆောင်သူများ ခန့်အပ်ခြင်းနှင့် ထုတ်ပယ်ခြင်း။
- အဖွဲ့၏ ငွေကြေးအသုံးစရိတ်သုံးစွဲမှုများကို အတည်ပြုပေးခြင်း။
- အဖွဲ့အစည်း၏ ဘဏ္ဍာရေးဆိုင်ရာကိစ္စရပ်များကို ပွင့်လင်းမြင်သာမှုရှိအောင်လုပ်ဆောင်ခြင်း။
- အဖွဲ့၏ နေ့စဉ်လုပ်ငန်းများကို ပေါင်းစပ်ညှိနှိုင်းလုပ်ဆောင်ခြင်း။
- LOT ၏အမည်ကျော်စောမှုကို ထိန်းသိမ်းပြီး ရပ်ရွာပြည်သူလူထုနှင့် အစိုးရတို့နှင့် ကောင်းမွန်သည့် ဆက်ဆံရေး တည်ဆောက်ခြင်း။
- သုံးလတစ်ကြိမ် ညွှန်ကြားရေးအဖွဲ့ထံ လုပ်ငန်းအစီရင်ခံစာ တင်သွင်းခြင်း။
၅။ အမှုဆောင်ညွှန်ကြားရေးမှူး၏ တာဝန်များပြီးဆုံးခြင်း –
- စာချုပ်ပြီးဆုံး/ရပ်နားခြင်း။
- LOT ၏ ဝန်ထမ်းရေးရာမူဝါဒအတိုင်း ညွှန်ကြားရေးအဖွဲ့၏ အနည်းဆုံး ၅ မဲဖြင့် ပယ်ချခြင်း။
- သေဆုံးခြင်း။
- နှုတ်ထွက်ခြင်း
၆.၄ စီမံခန့်ခွဲမှုအဖွဲ့ (Management Team)
၁။ စီမံခန့်ခွဲမှုအဖွဲ့သည် LOT ၏ နေ့စဉ်လုပ်ငန်းများကို အကောင်အထည်ဖော်ရသည့်အဖွဲ့ဖြစ် သည်။
၂။ စီမံခန့်ခွဲမှုအဖွဲ့သည် အမှုဆောင်ညွှန်ကြားရေးမှူးထံ တာဝန်ခံရပြီး အဖွဲ့အစည်း၏ ဌာနများနှင့် စီမံကိန်းများကို ထိန်းကြပ်ကြပ်မတ်သည်။
၃။ စီမံခန့်ခွဲမှုအဖွဲ့ဝင်များကို LOT ၏ ဝန်ထမ်းမူဝါဒအတိုင်း အတွေ့အကြုံနှင့် အရည်အချင်း< အဆင့်အတန်းပေါ်မူတည်၍ အမှုဆောင်ညွှန်ကြားရေးမှူးက ခန့်အပ်မည်။
၄။ စီမံခန့်ခွဲမှုအဖွဲ့ဝင်များမှာ အမှုဆောင်ညွှန်ကြားရေးမှူးနှင့် ဌာနအလိုက်ဦးဆောင်သူများ ဖြစ်သည်။
၅။ စီမံခန့်ခွဲမှုအဖွဲ့၏ တာဝန်များမှာ –
- အဖွဲ့၏ နေ့စဉ်လုပ်ငန်းများကို အကောင်အထည်ဖော်ခြင်း။
- ဌာနဝန်ထမ်းများကို ပံ့ပိုးကူညီပြီး စီမံခန့်ခွဲခြင်း။
- အမှုဆောင်ညွှန်ကြားရေးမှူး၏ အတည်ပြုချက်ရရှိပြီးနောက် စီမံကိန်းနှင့် ဌာနအလိုက်ဝန်ထမ်းများ ခန့်အပ်ခြင်း၊ ထုတ်ပယ်ခြင်း။
- စီမံခန့်ခွဲမှုဆိုင်ရာ ဆုံးဖြတ်ချက်များ ချမှတ်ရာတွင် အမှုဆောင်ညွှန်ကြားရေးမှူးကို ပံ့ပိုးကူညီခြင်း။
- တစ်ပတ်တစ်ကြိမ် ညွှန်ကြားရေးမှူးထံ ဌာနနှင့် စီမံကိန်းလုပ်ငန်းများကို အစီရင်ခံခြင်း။
- စီမံခန့်ခွဲမှုအဖွဲ့အစည်းအဝေးများကို အနည်းဆုံး တစ်ပတ်တစ်ကြိမ် ကျင်းပရမည်။
၆။ စီမံခန့်ခွဲမှုအဖွဲ့ဝင်အဖြစ်မှ ရပ်ဆိုင်းခြင်း –
- LOT ၏ ဝန်ထမ်းမူဝါဒအရ အမှုဆောင်ညွှန်ကြားရေးမှူးက ထုတ်ပယ်ခြင်း။
- သေဆုံးခြင်း
- နှုတ်ထွက်ခြင်း
အပိုဒ် ၇။ ငွေကြေး
LOT ၏ ဝင်ငွေများကို အောက်ပါအရင်းအမြစ်များမှ ရရှိသည်။
- LOT ၏ လုပ်ငန်းများမှ အကျိုးခံစားရသူများ၏ ထောက်ပံ့လှူဒါန်းငွေများ။
- ကွန်ဂရက်စ် အဖွဲ့ဝင်များ ထည့်ဝင်သည့် အဖွဲ့ဝင်ကြေးများ။
- စီမံကိန်းများ လုပ်ဆောင်ရန် ဖွံ့ဖြိုးရေး အဖွဲ့အစည်းများနှင့် သဘောတူစာချုပ် ချုပ်ဆိုခြင်းမှ ရရှိသည့် ငွေကြေးများ။
အဖွဲ့အစည်း၏ ငွေကြေး လက်ခံခြင်း၊ ထုတ်ပေးခြင်းနှင့် အစီရင်ခံခြင်းများကို LOT ၏ ငွေကြေးမူဝါဒအတိုင်း လုပ်ကိုင်ဆောင်ရွက်မည်။
အပိုဒ် ၈။ အဖွဲ့အစည်းပိုင် ပစ္စည်းများ
LOT အဖွဲ့အစည်းပိုင်ပစ္စည်းအားလုံးကို အဖွဲ့အစည်း၏ အမည်အောက်တွင် မှတ်ပုံတင်ထားရှိရမည် ဖြစ်ပြီး အဖွဲ့အစည်း၏ မရွှေ့ပြောင်းနိုင်သည့်ပစ္စည်းနှင့် ဝယ်ယူထားသည့်ပစ္စည်းများစာရင်းကို မူဝါဒချ မှတ်၍ စီမံခန့်ခွဲ အသုံးချရမည်။
အပိုဒ် ၉။ အဖွဲ့အစည်းကို ဖျက်သိမ်းခြင်း
Love Our Trees (LOT) – သစ်ပင်ချစ်သူများအဖွဲ့ ကို ဖျက်သိမ်းရန်မှာ ကွန်ဂရက်စ်၊ ညွှန်ကြားရေး အဖွဲ့၊ အမှုဆောင်ညွှန်ကြားရေးမှူးနှင့် စီမံခန့်ခွဲမှုအဖွဲ့တို့အားလုံး၏ စုပေါင်း ဆုံးဖြတ်ချက်ဖြင့် သာ ဖြစ်နိုင်ပြီး၊ လက်ရှိ ယင်းအစုအဖွဲ့အားလုံးမှ ပါဝင်သူဦးရေစုစုပေါင်း၏ အနည်းဆုံး ၅ ပုံ ၄ ပုံ (၄/၅) ၏ ထောက်ခံဆန္ဒမဲရရှိမှသာ ဖျက်သိမ်းရန်အတည်ပြုနိုင်မည်ဖြစ်သည်။ အစုအဖွဲ့အားလုံးကို ကိုယ်စားပြုသူ စုစုပေါင်း၏ သုံးပုံနှစ်ပုံ (၂/၃) က ဆန္ဒမဲပေးရန် မလာရောက်ခဲ့ပါလျှင် ဆန္ဒမဲရလဒ်မည်သို့ဖြစ်စေကမူ အတည်မပြုနိုင်ချေ။
အပိုဒ် ၁၀။ ဖွဲ့စည်းပုံအဓိပ္ပာယ်ဖွင့်ဆိုခြင်း
ဤ ဖွဲ့စည်းပုံစာတမ်းတွင် ပါရှိသည့်အချက်များကို အဓိပ္ပာယ်ဖွင့်ဆိုခြင်း သို့မဟုတ် ဤဖွဲ့စည်းပုံနှင့် သက်ဆိုင် သော အကြောင်းအရာများကို ရှင်းလင်းဖော်ပြရန်တာဝန်မှာ ကွန်ဂရက်စ်ထံတွင်ရှိသည်။ ယင်းအတွက် ပြုလုပ် သည့် အစည်းအဝေးကို အနည်း ဆုံး အဖွဲ့ဝင်ဦးရေ ထက်ဝက်(၁/၂)တက်ရောက်၍ ကွန်ဂရက်စ်အဖွဲ့ဝင် သုံးပုံ နှစ်ပုံ (၂/၃) ၏အတည်ပြုမဲဖြင့် အဓိပ္ပါယ်ဖွင့်ဆိုချက်ကို ဆုံးဖြတ်အတည်ပြုရမည်။
အပိုဒ် ၁၁။ ဖွဲ့စည်းပုံအတည်ပြုခြင်း
Love Our Trees (LOT) – သစ်ပင်ချစ်သူများအဖွဲ့ ၏ ကွန်ဂရက်စ်အဖွဲ့ဝင်များသည် ဤဖွဲ့စည်းပုံကို ၂၀၁၈ခုနှစ် မေလ ၁ ရက်နေ့ တွင် အတည်ပြုလိုက်သည်။
ဤဖွဲ့စည်းပုံသည် LOT ၏ ကွန်ဂရက်စ်မှ သဘောတူညီချက်ဖြင့် ပြန်လည်ပြင်ဆင်၍ ထပ်မံအတည်ပြုသည့် ဖွဲ့စည်းပုံမရှိသေးမီအထိ တရားဝင်ဖြစ်သည်။
