သန္ဓိ (Sandhi) ဟူသော စကားလုံးသည် Sanskrit ဘာသာဖြင့် “ချိတ်ဆက်မှု” သို့မဟုတ် “ ပေါင်းစည်းမှု” ဟု အဓိပ္ပါယ်ရသည်။ သန္ဓိအဖွဲ့ ကို ၂၀၀၈ ခုနှစ်တွင် လူမှုရေးနှင့် နိုင်ငံရေးအဖွဲ့အစည်းများတွင် အရည်အချင်းပြည့်မီသော ခေါင်းဆောင်များ မွေးထုတ် လေ့ ကျင့်ပေးရန် ရည်ရွယ်ချက်ဖြင့် ပြည်သူ့မူဝါဒ မာစတာဘွဲ့ရသူ နှစ်ဦးက စတင်တည်ထောင်ခဲ့ပါသည်။
သန္ဓိအဖွဲ့၏ မျှော်မှန်းချက်မှာ လူမှုရေးရာ တရားမျှတမှုနှင့် ဒီမိုကရေစီအုပ်ချုပ်မှုများ ကျယ်ပြန့်လွှမ်းမိုးသည့် လူ့အသိုင်းအဝိုင်းတစ်ခု ပေါ်ထွန်းစေရန် ဖြစ်သည်။ အဖွဲ့၏ ခံယူရပ်တည်ချက်မှာ မြန်မာနိုင်ငံတွင် ဒီမိုကရေစီအုပ်ချုပ်မှုစနစ် ထွန်းကားပြန့်ပွားလာစေရန် အရည်အချင်းပြည့်မီသော ခေါင်းဆောင်များ မွေးထုတ် လေ့ကျင့်သင်ကြားပေးခြင်းနှင့် မူဝါဒများပိုမိုကောင်းမွန်လာစေရန် ချမှတ်ထားသည့်မူဝါဒများ၊ လိုအပ်သည့်မူဝါဒများနှင့်ပတ်သက်၍ သုတေသနပြုလုပ်ခြင်းနှင့် အကြံပြုခြင်းတို့ဖြင့် လူမှုရေးရာတရားမျှတမှုရှိပြီး အများဆန္ဒကိုအခြေခံသည့် အုပ်ချုပ်စီမံမှုများနှင့် လိုလားသည့် လူ့အသိုင်းအဝိုင်းတစ်ခုကို တည်ဆောက်နိုင်မည်ဟု ယုံကြည်သည်။
ဤ မျှော်မှန်းချက်နှင့်ခံယူရပ်တည်ချက်များကို အကောင်အထည်ဖော်ရန်အတွက် သန္ဓိ၏ ရည်ရွယ်ချက်လုပ်ငန်းစဉ်များမှာ
- နိုင်ငံတည်ဆောက်ရေးတွင် မူဝါဒဆိုင်ရာ ဆုံးဖြတ်ချက်ချခြင်းနှင့် အများပြည်သူ မူဝါဒများကို လေ့လာအကဲဖြတ်၊ စောင့်ကြည့်ခြင်းတို့တွင် စိတ်ဝင်စားသည့် နိုင်ငံရေးခေါင်းဆောင်များနှင့် အရပ်ဘက်အဖွဲ့အစည်းခေါင်းဆောင်များ၏ ခေါင်း ဆောင်မှုစွမ်းရည်များကို မြှင့်တင်ရန်
- အများပြည်သူအုပ်ချုပ်ရေးအဖွဲ့အစည်းများ၏ ပွင့်လင်းမြင်သာမှု နှင့် တာဝန်ယူမှု တိုးတက်စေရန်နှင့်
- ပြည်သူလူထုနှင့်သက်ဆိုင်သည့် စီးပွားရေးလုပ်ငန်းများနှင့် အဓိကရင်းနှီးမြှုပ်နှံမှုများတွင် အဓိက အကျိုးသက်ရောက်သူများ/ပတ်သက်ဆက်စပ်သူများ၏ အသံနှင့် ပါဝင်မှု ခိုင်မာစေရန် အားကောင်းစေရန် တို့ဖြစ်သည်။
အဖွဲ့၏ ပင်မလုပ်ငန်းနှစ်ခုမှာ လေကျင့်သင်ကြားမှု training နှင့် သုတေသနပြုလုပ်ခြင်း research တို့ဖြစ်သည်။ သန္ဓိသည် အဖွဲ့အစည်းဖွံ့ဖြိုးတိုးတက်ရေး (OD)၊ ဒေသန္တရ နှင့် စီးပွားရေးဆိုင်ရာ အုပ်ချုပ်စီမံမှု၊ လူမှုအသိုင်းအဝိုင်းဖွံ့ဖြိုးတိုးတက်ရေး၊ နှင့် ဘဏ္ဍာရေး ဖက်ဒရယ်စနစ်ဆိုင်ရာတို့နှင့်ပတ်သက်၍ သင်တန်းများပေးခြင်း၊ အဖွဲ့လိုက်ပံ့ပိုးကူညီ အကြံပေးခြင်းတို့ကို ပြုလုပ်ပေးလျက်ရှိသည်။ ထို့ပြင် လူမှုရေးအဖွဲ့အစည်း ခေါင်းဆောင်များနှင့် အလားအလာရှိသည့် ခေါင်းဆောင်များအတွက် အလုပ်ရုံဆွေးနွေးပွဲများနှင့် ပုဂ္ဂလိက တစ်ဦးချင်း Mentorship များလည်း ပေးအပ်လျက်ရှိသည်။ ထို့အပြင် သန္ဓိသည် လူမှုတရားမျှတမှုနှင့် ဒီမိုကရေစီအုပ်ချုပ်မှု အကြောင်းအရာများနှင့် ဆိုင်သော သုတေသနအစီရင်ခံစာများ၊ ဆောင်းပါးများ၊ သို့မဟုတ် အခြေအနေ/ အကြောင်းအရာအလိုက် အကျဉ်းချုပ်အစီရင်ခံစာများကိုလည်း ရေးသား၊ထုတ်ဝေသည်။
