နိုင်ငံရေးခေါင်းဆောင်မှုသင်တန်း

နိုင်ငံရေးခေါင်းဆောင်မှုသင်တန်း၏ အဓိကရည်ရွယ်ချက်မှာ နိုင်ငံရေးပါတီများနှင့် အရပ်ဖက်
အဖွဲ့အစည်းများမှာ စွမ်းရည်ရှိသော ခေါင်းဆောင်များကို အားပေးထောက်ပံ့ပေးရန်၊ အုပ်ချုပ်ရေး၊ ဥပဒေပြုရေးနှင့် ဆုံးဖြတ်ချက်ချသည့်နေရာများတွင် ၎င်းတို့ကိုယ်တိုင် ပါဝင်ဆောင်ရွက်သည့်အခါတွင် ထိရောက်ကောင်းမွန်သော ခေါင်းဆောင်မှုစွမ်းရည်များ ထောက်ပံံ့လုပ်ဆောင်ပေးနိုင်စေရန် ဖြစ်ပါသည်။

သင်တန်းကို ရန်ကုန်မြို့တွင် ပြုလုပ်ပြီး တစ်ကြိမ်လျှင် (၂)ပတ်ကြာမြင့်ပြီး လေးကြိမ်သင်ကြားပို့ချပါသည်။ သင်တန်းသား/သင်တန်းသူများသည် မြန်မာနိုင်ငံရှိ ပြည်နယ်နှင့် တိုင်းဒေသကြီးအသီးသီးမှ တက်ရောက်လာကြခြင်းဖြစ်ပြီးခက်ခဲသော စစ်ဆေးမှုများကို ဖြတ်ကျော်ကြရပါသည်။ ဖြစ်ရပ်များနှင့်အချက်အလက်များကိုအခြေခံသော မူဝါဒချမှတ်ခြင်း လုပ်ငန်းစဉ်များကို အထောက်အကူဖြစ်နိုင်သည့် သုတေသနများ လုပ်ဆောင်ခြင်းသည်လည်း ထိုသင်တန်း၏ အရေးပါသော အပိုင်းတစ်ပိုင်းဖြစ်ပါသည်။ Sandhi Governance Institute မှ သုတေသန ဆိုင်ရာ ဒါရိုက်တာ၏ လမ်းညွှန်သင်ကြားမှုဖြင့် သင်တန်းသား/သင်တန်းသူများသည် သတင်း အချက်အလက် များ ကောက်ယူခြင်း၊ ရရှိလာသော သတင်းအချက်အလက်များကို ခွဲခြမ်းစိတ်ဖြာခြင်းများနှင့် အစီရင်ခံစာ ရေးသားခြင်းများကို လုပ်ဆောင်ကြရပါသည်။

သုတေသန

မြန်မာနိုင်ငံတွင် အချက်အလက်အခြေပြု မူဝါဒများ တိုးတက်ကောင်းမွန်လာစေရန် ရည်ရွယ်၍ သုတေသနအစီအစဉ်များကိုလည်း လုပ်ကိုင်ဆောင်ရွက်လျက်ရှိပါသည်။ ထို့ကြောင့် နိုင်ငံရေးခေါင်းဆောင်မှု သင်တန်းမှ သင်တန်းသား/သင်တန်းသူများသည် လူမှုသုတေသန ကျွမ်းကျင်မှုဆိုင်ရာ ပညာရပ်ကို သင်တန်း ပို့ချခြင်းအပြင် မိမိတို့ မြို့နယ်အသီးသီးတွင် အချက်အလက်များကို လက်တွေ့ကောက်ယူပြီး သုံးသပ်ခြင်းများ၊ အစီရင်ခံစာရေးသားခြင်းများကိုလည်း စာတွေ့ လက်တွေ့ များဖြင့် လေ့လာသင်ကြား ရပါသည်။

ထို့အပြင် သန္ဓိအဖွဲ့အနေဖြင့် ၂၀၁၅ ခုနှစ်မှစ၍ ယခုအချိန်ထိ ဆိုးလ်မြို့၊ အခြေစိုက်အဖွဲ့ ဖြစ်သည့် East Asia Institute (EAI) နှင့်ပူးပေါင်း၍ လူမှုသုတေသန လုပ်ငန်းများကိုလည်း လုပ်ကိုင် ဆောင်ရွက်လျက် ရှိပါသည်။ အဓိကအားဖြင့် မြန်မာနိုင်ငံ၏ ဒီမိုကရေစီ အပြောင်းအလဲတွင် ကောင်းမွန်သောမူဝါဒအသစ်များနှင့် အကြံဉာဏ်ကောင်းများကို ထွက်ပေါ်လာစေရန်အတွက် ပံ့ပိုးပေးနိုင်ရန်၊ စွမ်းရည်ပြည့်ဝသော သုတေသန ပညာရှင်အဖွဲ့အစည်းများ ပိုမိုခိုင်မာအား ကောင်းလာစေရန် ရည်ရွယ်၍ ပြုလုပ်ဆောင်ရွက်ခြင်း ဖြစ်ပါသည်။ သန္ဓိအဖွဲ့အစည်းသည် အာရှဖောင်ဒေးရှင်းအဖွဲ့နှင့် ပူးပေါင်း၍ ပစ္စည်းဝယ်ယူရေး မူဝါဒဆိုင်ရာ ရှေ့ပြေး သုတေသနစီမံချက်များကိုလည်း ပြည်နယ် (၁) ခုနှင့် တိုင်းဒေသကြီး (၂) ခုတို့တွင် လုပ်ဆောင်ခဲ့ပြီး သုတေသနအစီရင်ခံစာကို ရေးသားပြုစုခဲ့ပါသည်။